| Nuvena Di Natali
Ascuntati bona genti
lu viaggiu è dulurusu
fra lu friddu a valli e venti
va Maria cu lu so spusu
San Giuseppi era cunfusu
lu viaggiu avìa fari
ma l'ummirnu rigurusu
nun putìa viaggiari
San Giuseppi è cunsulatu
unn'avi cchiù malincunia
a ogni ghiurnu accumpagnatu
lu viaggiu cu Maria
E di partiri è disposta
Maria santa sposa e pura
San Giuseppi già s'accosta
pi serbìri la signura
Ora sunnu cunfidati
sti du santi amati e spusi
sunnu pronti apparicchiati
pi partirì su cunfusi
Viaggiava la signura
tutta amabili e modesta
e parìa na criatura
santa cara pia onesta
San Giuseppi cu Maria
s'incutannu lu viaggiu
caminannu pi la via
ogni beni ogni disagiu
Stanchi già di tanta via
mizzi murti su arrivati
San Giuseppi cu Maria
già trasiru ni la cittati
San Giuseppe tanti guai
fori sta mizzu la via
e dicinnu unni starai
pi stanotti spusa mia
Sdrivigliativi pastura
ca nascì lu verbu sia
nuduliddu e friddulusu
postu 'mbrazza di Maria
|
Nascita di Gesù
Rit. Viva l'amuri
di Gesù Bamminu
pi starini vicinu
ver'omu si fa
Versu mezzanotti
'na stidda stralucenti
ammita la genti
ch'è natu Gesù
Rit.
Ni sta grutta friddusa
ci cadi lu jelu
lu Re di lu celu
ver'omu si fa
Rit.
Lu Bamminu è 'ntrusciatu
'ntra na mangiatura
la paglia cchiù dura
fa lu lettu sò
Rit.
Bamminu 'nnuccenti
sintiti stu cantu
ch'è duci e ch'è santu
p'amuri a Gesù
Rit.
'Ncapu st'antaru
c'è nata na rosa
Gesuzzu arriposa
n'a sò verginità
Rit.
'Ncapu st'antaru
c'è natu un pumiddu
Gesù picciriddu
jucari si vò
Rit.
Omini e donni
facimmu fistinu
nascì lu Bamminu
lu Re di li Re
Rit.
|
Dormi Figliu
Cala l'Angilu Gabrieli
ci purtava latti e meli
lu pasturi di Gesuzzu
ci purtava l'agnidduzzu
Rit. Dormi figliu dormi amuri
ca t'annaca lu Signuri
dormi figliu fa la lò
ca t'annaca la mamma tò
Ora veni lu iardinaru
unn'avìa chi ci purtari
ci purtà n'aranciteddu
pi ghiucari lu bammineddu
Rit.
Ora veni lu lignamaru
unn'avìa chi ci purtari
ci purtà un fasciu ranni
p'asciucarisi li panni
Rit.
Ora veni lu furnaru
unn'avìa chi ci purtari
ci purtà un panidduzzu
pi Maria e pi Gesuzzu
Rit.
Ora veni lu viddanu
unn'avìa chi ci purtari
ci purtava carni e vinu
pi spamari lu Bamminu
Rit.
Ora veni lu picuraru
unn'avìa chi ci purtari
porta latti ni la hisca
cascavaddu e tuma frisca
Rit.
Ora veni la zingaredda
unn'avìa chi ci purtari
porta 'nmani na cuffitedda
cu nuciddi e castagnedda
Rit.
|
